Shugaban kasa Bola Ahmed Tinubu, jagoran Najeriya na yanzu, ya gabatar da sakon Sabuwar Shekara cike da fata, inda ya tabbatar wa ‘yan kasa cewa shekarar 2026 za ta zo da karin wadata ta hanyar ci gaba da aiwatar da sauye-sauye da kuma bunkasar tattalin arziki mai hada kowa da kowa.
Rahoton Labaranyau ya bayyana cewa, a cikin sanarwar da Shugaban kasa ya rattaba hannu a kanta ranar 1 ga Janairu, 2026, ya bayyana manyan nasarorin tattalin arziki da aka samu a shekarar 2025 duk da kalubalen da duniya ke fuskanta.
Ya bayyana cewa an samu karuwar ci gaban GDP a kowane zangon shekara, inda ake hasashen karin da zai haura kashi 4 cikin 100 a duk shekara, tare da samun rarar ciniki da kuma ragin hauhawar farashi zuwa kasa da kashi 15 cikin 100.
Tinubu ya yaba wa Kasuwar Hannayen Jari ta Najeriya (Nigerian Stock Exchange) bisa karuwar da ta kai kashi 48.12 cikin 100 a shekarar 2025, wanda ya samu ne sakamakon tsare-tsaren kudade masu inganci da suka kara ajiyar kudaden waje zuwa dala biliyan 45.4 zuwa karshen watan Disamba.
Zuba jarin kasashen waje kai tsaye (FDI) ya karu zuwa dala miliyan 720 a zangon uku na shekarar 2025, lamarin da ke nuna dawowar amincewar kasashen duniya, kamar yadda hukumomin tantance kudi irinsu Moody’s, Fitch, da Standard & Poor’s suka tabbatar.
Shugaban kasar ya dauki alkawarin kara rage hauhawar farashi a shekarar 2026, tare da tabbatar da cewa amfanin sauye-sauyen tattalin arziki ya kai ga talakawan gida, yayin da ake fadada damar kudaden gwamnati domin zuba jari a bangaren gine-gine da bunkasa jarin dan Adam.
Ya yaba wa jihohin da suka rungumi dokokin haraji na bai daya domin rage wahalar haraji masu yawa, tare da jaddada ci gaba da aiwatar da gyare-gyaren haraji don samun kudaden shiga masu dorewa da kafa tubalin adalci a harkar kudi.
A bangaren tsaro, Tinubu ya sake jaddada kudurin gwamnatinsa na kawar da barazana, inda ya ambaci nasarorin ayyukan tsaro kan ‘yan ta’adda a Arewa maso Yamma da kuma ci gaba da kokari a Arewa maso Gabas.
Ya bukaci tsarin ‘yan sanda na rarrabawa (decentralised policing) tare da tanade-tanade na kariya, da kuma samar da masu gadin dazuzzuka masu tsari da kulawa domin yakar ‘yan bindiga da ta’addanci yadda ya kamata.
Shirin Renewed Hope Ward Development Programme zai kara karfi, inda ake sa ran karfafa mutane 1,000 a kowace mazaba daga cikin mazabu 8,809 na Najeriya, domin bunkasa tattalin arzikin yankuna ta hanyar noma, kasuwanci, da hakar ma’adinai.
Ayyukan manyan gine-gine da ake ci gaba da yi a bangarorin hanyoyi, lantarki, tashoshin jiragen ruwa, layin dogo, lafiya, ilimi, da noma za su ci gaba ba tare da tangarda ba, domin inganta wadatar abinci da rayuwar al’umma.
A karshe, Tinubu ya yi kira ga ‘yan Najeriya da su hada kai cikin kishin kasa, gaskiya, da himmar zama ‘yan kasa nagari, domin cimma cikakken burin kasa a sabuwar shekara.
